โย โกจิ จกฺขุมา ปุริโส สกยวเนปิ จีนวิลาเตปิ อลสนฺเทปิ นิกุมฺเพปิ กาสิโกสเลปิ
กสฺมิเรปิ คนฺธาเรปิ สคมุทฺธนิปิ พฺรหฺมโลเกปิ ยตฺถ กตฺถจิปิ ฐิโต อากาสํ ปสฺสติ เอวเมว
โข มหาราช สีเล ปติฏฺฐิโต โยนิโส มนสิกโรนฺโต สกยวเนปิ ฯ เป ฯ ยตฺถ กตฺถจิปิ
ฐิโต สมฺมาปฏิปนฺโน นิพฺพานํ สจฺฉิกโรติ ฯ ยถา ปน มหาราช สกยวเนปิ ฯ เป ฯ
ยตฺถ กตฺถจิปิ ฐิตสฺส ปุพฺพทิสา อตฺถิ เอวเมว โข มหาราช สีเล ปตฏฺฐิตสฺส โยนิโส
มนสิกโรนฺตสฺส สกยวเนปิ ฯ เป ฯ ยตฺถ กตฺถจิปิ ฐิตสฺส สมฺมาปฏิปนฺนสฺส นิพฺพานสฺส
สจฺฉิกิริยา อตฺถีติ ฯ สาธุ ภนฺเต นาคเสน เทสิตํ ตยา นิพฺพานํ เทสิตา นิพฺพานสฺส
สจฺฉิกิริยา อุสฺสาปิโต ธมฺมธโช สณฐาปิตา ธมฺมเนตฺติ เอวเมตํ ตถา
สมฺปฏิจฺฉามีติ ฯ

นิพฺพานสฺสปฏฺฐานปญฺโห สตฺตโม

อถ โข โส มิลินฺโท ราชา กวินา สทฺธึ สาราณิยํ อนุปวิฏฺโฐ ญาตุกาโม
โสตุกาโม ธาเรตุกาโม ญาณาโลกํ ทฏฺฐุกาโม อญาณํ ภินฺทิตุกาโม ญาณํ อุปฺปาเทตุกาโม
อวิชฺชํ นาเสตุกาโม สํสารโสตํ สมติกฺกมิตุกาโม ตณฺหาโสตํ ฉนฺทิตุกาโม อมตํ ปาตุกาโม
นิพฺพานํ ผุสฺสิตุกาโม อธิมตฺตํ ฉนฺทญฺจ อธิมตฺตํ วายามญฺจ ธิติญฺจ อุสาหญฺจ
สติสมฺปชญฺญญฺจ อุปถมฺเภตฺวา เถรํ นาคเสนํ เอวํ สมปุจฺฉิ
กึ ปน ภนฺเต นาคเสน พุทฺโธ ตยา ทิฏฺโฐติ ฯ เถโร อาห น หิ
มหาราชาติ ฯ กึ ปน เต อาจริเยหิ พุทฺโธ ทิฏฺโฐติ ฯ น หิ มหาราชาติ ฯ
ภนฺเต นาคเสน น กิร ตยา พุทฺโธ ทิฏฺโฐ นาปิ กิร เต อาจาริเยหิ พุทฺโธ
ทิฏฺโฐ ฯ เตนหิ ภนฺเต นาคเสน นตฺถิ พุทฺโธ น เหตฺถ ปญฺญายตีติ ฯ เถโร อาห
อตฺถิ ปน เต มหาราช ปุพฺพกา ขตฺติยา เย ตว ขตฺติยวํสสฺส ปุพฺพงฺคมาติ ฯ อาม
ภนฺเต โก สํสโย อตฺถิ ปุพฺพกา ขตฺติยา เย จ มม ขตฺติยวํสสฺส ปุพฺพงฺคมาติ ฯ
ทิฏฺฐปุพฺพา ปน ตยา มหาราช ปุพฺพกา ขตฺติยาติ ฯ หิ ภนฺเตติ ฯ เย ปน
ตํ มหาราช อนุสาสนฺติ ปุโรหิตา เสนาปติโน อกฺขทสฺสาา มหามตฺตา ธุตฺติสทฺธิปาสามนิกา
สตฺถวาหา เอเต ปุพฺพกา ขตฺติยา ทิฏฺฐปุพฺพาติ ฯ น หิ ภนฺเตติ ฯ ยทิ ขลุ
น เต มหาราช ปุพฺพกา ขตฺติยา ทิฏฺฐา นาปิ กิร เต อนุสาสเกหิ ปุพฺพกา ขตฺติยา
ทิฏฺฐา กตฺถ ปุพฺพกา ขตฺติยา น เหตฺถ ปุพฺพกา ขตฺติยา ปญฺญายนฺตีติ ฯ ทิสฺสนฺติ
ภนฺเต นาคเสน ปุพฺพกานํ ขตฺติยานํ อนุภูตา ปริโภคิยา ภณฺฑา เสยฺยถีทํ เสตจฺฉตฺตํ